Krijo faqe interneti me domain .al

Hapi 1: zgjidhni emrin

Emri është gjëja e vetme që nuk e ndryshoni dot lehtë më vonë, ndaj vlen t’i kushtoni pak kohë. Një emër i mirë është i shkurtër, i lehtë për t’u shqiptuar dhe nuk ka nevojë të drejtshkruhet kur e thoni me telefon. Shmangni vizat dhe numrat, dhe kini parasysh se regjistri .al nuk pranon shkronjat ë dhe ç.

Para se të vendosni, kontrolloni dy gjëra: që emri të mos jetë markë e regjistruar te DPPI dhe që të mos jetë në listat e emrave të ndaluar ose të rezervuar të AKEP. Më shumë këshilla gjeni te si të zgjidhni emrin e domainit.

Hapi 2: regjistroni domainin .al

Kërkoni emrin në kutinë e kërkimit dhe zgjidhni ekstensionin. Domaini .al kushton €8.99 në vit, ndërsa .com.al, .net.al dhe .org.al kushtojnë €9.99 në vit, pa TVSH. Mund ta regjistroni nga 1 deri në 10 vjet.

Gjatë porosisë plotësoni të dhënat e regjistruesit dhe ngarkoni dokumentin: dokument identifikimi për persona fizikë ose ekstrakt QKB për kompani. Aplikimi verifikohet nga AKEP dhe, me dokumentacion të plotë, aprovohet zakonisht brenda 1–3 ditësh pune. Gjatë kësaj kohe mund të përgatitni hapat e tjerë. Detajet janë te regjistro domain .al.

Hapi 3: merrni hosting

Domaini është adresa; hostingu është vendi ku qëndrojnë skedarët e faqes. Për një faqe prezantuese, blog ose portofol mjafton zakonisht një hosting i përbashkët. Nëse e dini që do të përdorni WordPress, një hosting për WordPress ju kursen disa hapa. Krahasimin e mundësive e gjeni te hosting për domain .al.

Hapi 4: instaloni WordPress

WordPress është një nga mënyrat më të përhapura për të ndërtuar një faqe pa shkruar kod. Pas instalimit nga paneli i hostingut:

• zgjidhni një temë të thjeshtë dhe të shpejtë, që shfaqet mirë në celular;
• vendosni gjuhën shqip te cilësimet, që data dhe mesazhet të dalin në shqip;
• krijoni faqet bazë: Kreu, Rreth nesh, Shërbimet dhe Kontakti;
• instaloni vetëm shtojcat që ju duhen dhe mbajini të përditësuara.

Nëse preferoni një platformë tjetër, hapat e domainit dhe të DNS-it mbeten të njëjtë.

Hapi 5: lidhni domainin me hostingun

Pasi domaini aprovohet, duhet t’i tregoni internetit ku ndodhet faqja. Ka dy rrugë:

1. Ndryshoni nameserverët te ata të ofruesit të hostingut, nëse doni që ai të menaxhojë të gjithë zonën DNS.
2. Mbani DNS-in e menaxhuar pa kosto shtesë dhe shtoni rekordet A ose CNAME që ju jep hostingu. Paneli lejon edhe rekordet AAAA, MX, TXT, SRV dhe CAA.

Ndryshimet mund të kërkojnë pak kohë derisa të përhapen në rrjet. Kontrolloni gjendjen me DNS Checker. Shpjegimi i plotë është te DNS dhe nameserver.

Hapi 6: aktivizoni SSL

Certifikata SSL bën që faqja të hapet me HTTPS dhe shfletuesi të mos e shënojë si të pasigurt. Aktivizojeni sapo domaini tregon drejt hostingut, sepse certifikata lëshohet për domainin që i përgjigjet serverit. Kontrolloni nëse paketa juaj e përfshin, ose shtoni një nga certifikatat SSL. Pastaj sigurohuni që çdo adresë me HTTP të ridrejtohet te HTTPS.

Hapi 7: krijoni email-in me domainin

Hapi i fundit është një adresë si [email protected]. Mund ta krijoni me Google Workspace, OX App Suite ose një shërbim tjetër, duke shtuar rekordet MX dhe TXT që ju jep ofruesi. Shihni email profesional me domain .al.

Kur faqja të jetë online, mos e lini bosh: sipas rregullores, një domain .al që nuk vihet në përdorim për një vit nga regjistrimi ose rinovimi mund të kalojë në gjendje të lirë.

Pyetje të shpeshta