Sa zgjat regjistrimi i domainit .al?

Afatet në një tabelë

Afati 1–3 ditë pune është ai që shohim në praktikë për aplikimet me dokumentacion të plotë. Nuk është një afat i garantuar: ditët e pushimit nuk llogariten si ditë pune, dhe një aplikim që kthehet për plotësim zgjat më shumë.

Hapat një nga një

1. Kërkoni emrin

Shkruani emrin në kutinë e kërkimit dhe shihni nëse është i lirë. Nëse rezultati thotë “nuk mund të regjistrohet”, emri është në listën e emrave të rezervuar ose të ndaluar të AKEP dhe duhet të zgjidhni një tjetër. Lexoni si ta kontrolloni një domain .al.

2. Plotësoni porosinë

Zgjidhni periudhën nga 1 deri në 10 vjet dhe plotësoni të dhënat e regjistruesit, të kontaktit administrativ dhe teknik: emër i plotë ose emër subjekti, adresë, email dhe telefon. Email-i i regjistruesit është kritik, sepse përmes tij dërgohen njoftimet për skadim dhe konfirmimet e transferimit.

3. Ngarkoni dokumentet

Për persona fizikë kërkohet një dokument identifikimi i vlefshëm. Për shoqëri kërkohet ekstrakti i QKB-së. OJF-të paraqesin vendimin e regjistrimit ose ekstraktin, ndërsa subjektet e huaja një dokument regjistrimi të barasvlershëm. Lista e plotë është te dokumentet e nevojshme.

4. Verifikimi nga AKEP

Aplikimi kalon për verifikim te AKEP. Në praktikë, aprovimi kryhet brenda 1–3 ditësh pune, në varësi të plotësisë së dokumentacionit. Nëse mungon një dokument ose të dhënat nuk përputhen, aplikimi kthehet për plotësim, ndaj mbani nën kontroll email-in e regjistruesit.

5. Aktivizimi

Pas aprovimit domaini aktivizohet dhe shfaqet në panelin e klientit, nga ku mund të konfiguroni DNS-in.

Çfarë e vonon aplikimin

Shumica e vonesave nuk lidhen me AKEP, por me aplikimin vetë. Shkaqet më të zakonshme:

• Dokument që mungon. Aplikimi kthehet për plotësim dhe verifikimi zgjat më shumë.
• Të dhëna që nuk përputhen. Për një shoqëri, emri i subjektit te ekstrakti i QKB-së duhet të përputhet me emrin e regjistruesit. Për një person fizik, të dhënat e dokumentit duhet të përputhen me kontaktin e regjistruesit.
• Të dhëna të pasakta. Asnjë emër domain nuk regjistrohet me të dhëna të rreme, dhe deklarimet e rreme përbëjnë vepër penale sipas Kodit Penal.
• Email i gabuar ose i paaksesueshëm. Nëse nuk i merrni mesazhet tona, nuk mund të reagoni shpejt kur kërkohet një plotësim.

Që emri të mos përfundojë në një aplikim të refuzuar, kontrolloni edhe regjistrin e DPPI-së: emrat e markave të miratuara që përkojnë saktësisht me një domain .al janë të rezervuar për poseduesin e markës. Nëse aplikimi nuk aprovohet nga AKEP, pagesa juaj kthehet; nëse aprovohet, kthimi i parave nuk bëhet.

Pas aprovimit: DNS dhe faqja

Pasi domaini aktivizohet, keni dy mënyra për ta lidhur me faqen dhe email-in: vendosni nameserverët e ofruesit tuaj të hosting-ut, ose mbani DNS-in e menaxhuar nga UpFlare dhe shtoni rekordet A, CNAME, MX dhe TXT nga paneli, pa kosto shtesë.

Ndryshimet DNS nuk janë të menjëhershme. Nameserverët mund të marrin deri në 24–48 orë për t'u përhapur plotësisht, ndërsa rekordet individuale zakonisht përditësohen brenda TTL-së së caktuar, shpesh 1–4 orë. Udhëzuesi i plotë është te DNS dhe nameserver.

Mos harroni rregullin e përdorimit: sipas rregullores, një domain .al që nuk vihet në përdorim për 1 vit nga data e regjistrimit ose rinovimit mund të kalojë në gjendje të lirë. Lidheni domainin me një faqe ose me email sa më shpejt.

Rinovimi dhe transferimi

Rinovimi i një domaini ekzistues kryhet nga paneli i klientit me të njëjtin çmim si regjistrimi: €8.99 në vit për .al dhe €9.99 për .com.al, .net.al dhe .org.al, pa TVSH. Ju këshillojmë ta rinovoni të paktën 30 ditë para skadimit. Lexoni më shumë te rinovimi i domainit .al.

Për transferimin nga një regjistrar tjetër ju duhet kodi i autorizimit (EPP / AUTH Code), që duhet përdorur brenda 24 orësh nga lëshimi. Shihni udhëzuesin e transferimit.

Pyetje të shpeshta